گؤزومه باليق باشي گؤرونور.
موللا چوخ باليق يئين ايدي. سوفره سينده نه خؤرک اولورسا اولسون، يانيندا موطلق باليق اولمالي ايدي. آروادي ايسه باليقدان چيرکينميشدي. ارينه چوخ يالواريردي کي، آرابير باليقسيز خؤرک ده يئسين، موللا قولاق آسميردي. آخيردا آرواد کيشيسيندن بيخبر بازاردان بير يوک تزه باليق آليب ائوه گتيردي، مطبخده قويوب اوستونو اؤرتدو کي، اري گؤرمه سين.
آرواد گئجه موللاني يوخويا وئريب، باليقلاري حَيَطه،
داما، يولا و کوچه يه سپله دي، ائوه قاييديب ياواشجا موللاني اوياتدي و دئدي:
– آ کيشي، حَيَطه چيخميشديم، آياغيما بير شئي ديدي،
گؤردوم باليقدير. ايشيق يانديرديم کي، گؤروم بو نئجه شئيدير، هر ياندا باليق گؤردوم. اولجه خيال ائتديم کي، محلله اوشاقلاري ظارافاتجا آتيبلار. آخي سنين باليق يئمگين هامييا م’لومدور. چيخديم داما، باخديم
کوچه يه، يئنه باليق گؤردوم. دئييرم بلکه بو گئجه گؤيدن ياغيش عوضينه باليق ياغيب… نه قدر کي، قونشولار خبر توتماييب، دور، ييغاق.
موللا سئوينجک يئريندن قالخيب گئييندي، آروادي ايله
برابر حَيَطدن، داملاردان و کوچه دن باليقلاري ييغديلار.
ال-آياقلاريني يويوب، شاد-خوررم ياتديلار. صاباح اولجاق موللا آروادا تاپشيردي کي، آخشام باليقپلوو بيشيرسين، باليغا دا قناعت ائلمه سين.
آخشام موللا مسجيددن گلدي. آرواد پلووو چکيب
موللانين قاباغينا قويدو. آنجاق سوفره ده باليق يوخ ايدي. موللا آرواديندان سوروشدو:
– بس بونون باليغي هاني؟
آرواد دئدي:
– مگر باليق آلميشدين کي، بيشيريديم؟
موللا دئدي:
– آي آرواد، سن نه دانيشيرسان؟ بس گئجه ياغان باليقلار نه اولدو؟
آرواد اريندن بو سوالي ائشيدنده باشلادي قيشقيرماغا:
«واي، داد اريم دلي اولوب، باشينا هاوا گليب!» قوهوم-قونشو ييغيليب بو ايشه متتل قالديلار. آرواد گئديب ديوانا خبر وئردي. تهقيقات اوچون موللاني ديوانا آپارديلار. موللا گئجه گؤردويونو ديواندا دا سؤيله دي. حاکيم موللاني دلي حساب ائديب، دليخانايا گؤندردي…
موللا بير نئچه گون دليخانادا قالاندان سونرا بير تانيشي يانينا گلدي. بورايا دوشمگي نين سببيني سوروشدو. موللا اونا دا باشينا گلن قزيييه ني دانيشدي. تانيشي موللايا دئدي:
– دوستوم، آروادين سنه کلک گلميشدير. گؤيدن ده
باليق ياغار؟ بو دفعه حاکيملر سندن بو باره ده سؤز
سوروشاندا دئ کي، باليق ياغدي ندير؟ ظارافاتيم توتموشدو، ائله بئله دئييرديم. باليق دا ياغارمي؟
موللا اؤيرنديگيني حاکيمه دئيير، اونو بوراخيرلار.
آروادي يئنه موللا اوچون آش بيشيرميشدي. بو دفعه باليغي
نيمچه نين ايچينده، آشين آلتيندا گيزلتميشدي. موللا بير-ايکي پنجه يئميشدي کي، دوگونون آلتيندان باليغين باشي گؤروندو. موللا تئز اليني چکيب آغزيني سيلدي. آرواد دئدي:
– آي کيشي، نه تئز دويدون؟
موللا دئدي:
– آرواد، دويماغينا دويماميشام. دئميرم ده کي،
آشدا باليق وار. آما گؤزومه باليق باشي گؤرونور.