ملانین گوزونون آغی – قاراسی بیر نوه سی وار ایدی. اوشاق بَرک ناخوشلامیشدی، گونو گوندن یاوالاشیردی.
بیر گون اوشاغین حالی لاپ خارابلاشدی.
ملا دوروب اوشاغین باشینا دولاندی و اوزونو گؤیه توتوب دئدی:
پروردیگارا! منیم بو عزیز نوه مه رحم ائله، اونو ساغالت، اونون يئرینه منیم جانیمی آل.
من دونیانین یاخشی یامانین گؤرموشم.
ملا یالواراندا حیاط دا دانا دا باشینی گوودوشا (سو قابینا) سوخوب سو ایچیرمیش. گوودوش کئچیر دانانین باشینا. حیوان باشینی او یانا بو یانا ترپه ده ترپه ده ائوین قاپیسیندان ایچری کئچیر.
ملا باشین قالدیریب عجیبه قریبه بیر شئی گؤرور. ائله بیلیر کی، آللاه اونون دوعاسینی قبول ائدیب، عزرائیلی گوندریب کی، اونون جانینی آلسین.
ملا قورخوسوندان بیر گوشه یه سیخیلیب اسه – اسه دئییر:
یا عزراعیل! واللاه، بیللاه، ناخوش من دئیلم، باخ بو اوشاقدیر.