ایللرین بیرینده موللا نصرالدینین بوستانی هامیدان قاباق و چوخ
یاخشی محصول وئریر. موللا فیکیرلشیر کی، بیر ائششک یوکو خیار گوتوروب
تئیمور لنگه آپارسین، بلکه ایشدی، رحمه گلدی، بیر یاخشی هدیه
وئردی.
سحر تئزدن دوروب خیاری دریر، ائششه‌یه یوکله‌ییب، شهره طرف یولا
دوشور. بو طرف‌دن ده تئیمور لنگ تکباشینا، آتلا هارایا ایسه گئدیرمیش. یولدا بون‌لار راستلاشیرلار.
تئیمور موللا‌دان سوروشور:
– آ کیشی، بو ندیر بئله؟ هارایا آپاریرسان؟
موللا دئییر:
– تزه خیاردی. تئیمور لنگه نوبار آپاریرام.
تئیمور موللا نصرالدینی هله تانیمیرمیش. گورور کی، بو کیشی ده
اونون تئیمور اولدوغونو بیلمیر. دئییر:
– آ کیشی، سن تئیمورلا دوست دئییلسن، تانیش دئییلسن، تای دئییل‌سیز،
توش دئییل‌سیز. سنه نه دوشوب کی، اونون بئله قئیدینه قالیرسان؟
موللا گولوب دئییر:
– من ائله بیلیردیم کی، دونیادا عقل‌سیز بیرجه منم، اما ایندی
گورورم کی، سن من‌دن ده عقل‌سیز ایمیشسن؟
سوز تئیمورا توخونور، آنجاق اوزونو تانیتماماق اوچون اوزه وورماییب سوروشور:
– یاخشی سن منیم عقل‌سیز اولدوغومو ندن بیلدین؟
موللا دئییر:
– اوندان بیلدیم کی، بو یاشا چاتمیسان، هله ده منی تانیمیرسان. بیلمیرسن کی، من موللا نصرالدینم. موللا نصرالدین ده کی، تئیمور
لنگ کیمی‌لرین قئیدینه قالماز.
تئیمور دئییر:
– یاخشی، ایندی کی، سن موللا نصرالدینسن، اوزون ده تئیمورون قئیدینه قالان دئییلسن، بس بو نوباری نیه آپاریرسان؟
موللا دئییر:
– آپاریرام کی، بیرتهر بوش دامارینی توتوب بیر آز هدیه‌دن-زاددان آلام، کولفتیمی دولاندیرام.
تئیمور دئییر:
– یاخشی، سن ندن بیلیرسن کی، تئیمور سنه هدیه وئره‌جک؟
موللا دئییر:
– اولاً، ائشیتدیگیمه گوره او چوخ دا درین عقل‌لی آدام دئییل. بالاجا
کی، قولتوغونون آلتینا وئردین، سونرا لاپ نوختالاییب مینه‌سن ده باشا
دوشمز. سونرا دا کی، وئرمز دئینده دده‌سی‌نین مالینی وئرمیر کی؟
جاماعاتین مالی‌دیر دا…
تئیمور یامان غضب‌لنیر. اما هله بیر سوز دئمیر. سوروشور کی:
– یاخشی، ایندی بو بیر یوک خیار اوچون سن تئیموردان نه هدیه
گوزله ییرسن؟
موللا دئییر:
– نه بیلیم؟ باختیم یار اولسا، بیر اللی‌دن-یوزدن قولاغینی کسمک
فیکرینده‌یم.
تئیمور دئییر:
– یوخ آشنا، ایشتاهان چوخ بویوک‌دور. اینانمیرام بو قدر وئره.
موللا دئییر:
– جانی جهنم، وئرمه‌سین. بیر اوتوزدان-قیرخ‌دان آلارام کی…
تئیمور دئییر:
– یوخ، او دا چوخ اولدو.
موللا دئییر:
– یاخشی، اولسون ایگیرمی-ایگیرمی بئش. دونوزدان بیر توک ده چکسن غنیمت دیر.
تئیمور حیرصلنیب دئییر:
– اگر هئچ نه وئرمه‌سه؟
موللا دئییر:
– ائششکیمین قویروغونو کسیب قویارام اولوب-اولوسونون گورونا.
تئیمور هئچ بیر سوز دئمه‌ییب، آتینی سوروب گئدیر. موللا دا یولونا
داوام ائلییر.
تئیمور بیر کسه یول ایله تئز شهره قایی‌دیر. بیر آزدان سونرا موللا
دا گلیب چیخیر. تئیمور اوزونه بیر نیقاب سالیب موللانی یانینا چاغیرتدیریر.
خیارلارا باخیر، سونرا سوروشور:
– یاخشی، ایندی بو نوبار اوچون من‌دن نه ایسته ییرسن؟
موللا دئییر:
– نه ایسته‌یه‌جه‌یم، قیبلئیی-عالم ساغ اولسون! هئچ نه. ائله بیر اللی-
دن-یوزدن وئرسه‌نیز، کولفتیمی دولاندیرارام.
تئیمور دئییر:
– یوخ، بو چوخ بویوک اولدو.
موللا دئییر:
– چوخ بویوک اولدو، قوی اولسون اوتوز-قیرخ.
تئیمور دئییر:
– یوخ، او دا چوخ اولدو.
تئیمورون سسین‌دن موللا تانیییر کی، بو، یولدا راست گلیب صوحبت
ائلدیگی آدامدی. آنجاق گورور کی، ایش-ایشدن کئچیب. اودور کی، هئچ اوزونو
ایتیرمه‌ییب دئییر:
– یاخشی، قوی اولسون ایگیرمی-ایگیرمی بئش. او دا غنیمت‌دیر.
تئیمور نیقابینی قالدیریر کی:
– اگر هئچ نه وئرمه‌سم…
موللا دئییر:
– من یولدا دئدیم کی، موللا نصرالدینم، قیبلئیی-عالم!
دئدیگیم‌دن دونمرم. اگر ایگیرمی-ایگیرمی بئشی ده وئرمه‌سن… قارا
ائششک دایانیب قاپیدا، قویروغو دا یانیندا.