قاضي و خوروز
قازينين حَيَطينده آخساق بير خوروز وار ايدي. بير گون
حَيَطده ائشلنرکن خوروز بير مانقور («قارا ياريم
قپيکليک سیککه پول») تاپير. خوروز مانقورو ديمديگينه گؤتوروب حَيَطين اورتاسينا قويور و بانلاماغا باشلايير:
«قوققولو-قو، بير دنه مانقور تاپميشام!» قازي آداملاريني گؤندردي، مانقورو خوروزدان آلديلار.
خوروز يئنه بانلادي: «قوققولو-قو، قازي منه مؤحتاجميش»
قازي آداملارينا دئدي: «اپارين، خوروزون مانقورونو
قايتارين»
خوروز مانقورو آليب يئنه بانلاماغا باشلادي:
«قوققولو-قو، قازي مندن قورخارميش!»
قازي يئنه اؤز آداملارينا دئدي: «بو خوروز مني تنگه
گتيردي. گئدين، باشيني کسين، بيشيريب پلووون اوستونه قويون.
اونو يئيه جگم».
خوروزون باشيني کسنده او يئنه برکدن بانلاييب دئدي:
«قوققولو-قو، نه ايتي بيچاقميش!»
خوروزون باشيني کسندن سونرا قازانا ساليب بيشيرديلر.
خوروز قازاندا دا بانلادي: «قوققولو-قو، نه ايستي حامامدير!»
پلووو بير بؤيوک نيمچه يه چکيب خوروزو اوستونه قويدولار.
خوروز بانلادي: «نه آغجا تپه دير!»
قازي خوروزو پارچالاييب يئمه يه باشلادي. چئينه ييب
اوداندا خوروز بانلادي: «نه دارجا کوچه دير!» ..خوروز
پلووقاريشيق قازي نين قارنينا دوشنده بير ده بانلادي:
«قوققولو-قو، نه لئهمه دره دير!»
قازي او قدر يئدي کي، قارني پارتلادي. خوروز قازي نين
قارنيندان چيخيب بانلادي: «قوققولو-قو، قازي نين قارني ييرتيلدي، منيم جانيم قورتولدو!»