قلم عنایت ایله سن دانیش منه رقیه دن
اولوبدی لطف ومرحمت گنه سنه رقیه دن
رقیه کی زمانه ده آدی دوشوبدی دیللره
جهاندا احترامی وار عزیزیدی بو ائللره
همیشه دردمندلر دوا آلوب رقیه دن
مریضیلر مریضه لر شفا آلوب رقیه دن
کی درگهینده ناامید بیرین بوهرگز ائتمیوب
گلن بوآستانه دن کی دستی خالی گئتمیوب
جهاندا اهل هاویه چاتوبدور ئوز مرامینه
یزید دون وئروبدی حکم کی شامیده غلامینه
دئدی رقیه نون سسی یاتان زماندا قویمیور
منیم یوخ استراحتیم قیزیم یاتاندا قویمیور
گرک اوقانلی باش گئده رقیه نون قباقینه
باخاندا قلبی اودلانا یارالانان دوداقینه
گوره اوذبح اولان باشی جهاندا قلبی تنگ اولا
اوقیز باخا آتاسینا گرکدی غصه مرگ اولا
حسینون اول زمان باشین گتوردیلر خرابیه
بوظلمی عمدی ائیلین اولوب یزید ذابیه
رقیه باشی گورجَئگین توکوب عذاره گوز یاشین
آتاسی نین آلوبدی تئز باسوبدی باغرینا باشین
باخوب اوباشه آغلیوب دئدی سنه گوزوم فدا
بوغازوون یاراسینا گرک اولام ئوزوم فدا
عجب خرابه منزله صفا گتوردون آی بابا
جهاندا اولمیوب سنه بیری وفاده تای بابا
قسم علیِ اکبره و هم علیِ اصغره
اوزون قولی دوشن عموم قسم یارالی حیدره
قسم رسول خاتمه کی سندن اولمارام جدا
منیده سن آپار بابا قوی حُزندن اولوم رها
بابا اجازه وئر دئیوم نئلر گلوبدی باشیمه
باخ ایندی سن بوحینیده ایاقیمون خراشینه
اوحالدا تئز آتاسینا وئروب ایاقلارین نشان
دئیوبدی بیربه بیرسوزون باباسینا اوباغری قان
سالاندا آت قباقینه ویراندا زجر دون منی
قاچاندا ویردی باشیمه هرایه سسلدیم سنی
هرایمه ندن منیم او ماجراده گلمدون؟
اوچولده چاره سیز قالان زماندا داده گلمدون؟
ایاق یالین قاچان زمان َدگوبدی قمچی چوخ منه
او حالدا قالدیم آی بابا توسل ایلدیم سنه
فدا اولوم دوداقوون اوخیزران یاراسینا
دئنن گوروم دوا قویوم یاراسینن هاراسینا؟
بابا گتوردیلر بیزی نه ذلتیله شامه جک
ویروبلار اهل بیتووی عداوتیله شامه جک
ورود شام اولان زمان تمام عترتون سنون
چالندی دُف ویرلدی کف شماتت ائتدی دشمنون
سیخیلدی قلبی غصدن بدنده اولمادی توان
یوموبدی گوزلرین خانم یخلدی اوردا چیخدی جان
یازوبدی “همدم” ای خدا سوزی خانم رقیه دن
جزاده اجرینی آلار ئوزی خانم رقیه دن
✍عسگر همتی گرده(همدم)
@heyaateashegan
🆔 @gerdeh_ir