یوم میلاد خانم فاطمه ی اطهرده
بئله فرمایش ائدب ختم رسل منبرده
بویوروب امّتینه سید سالار بشر
خلق اولوب روحیمله نوریم ایکی پیکرده
اوّلی یار وفاداریدی پیغمبروزه
دوّمی خلق اولونوب دختر پیغمبرده
آلاجاق معرفتن درسینی زهرا مندن
اولاجاق خصلیتنون اوخشاری چوخ حیدرده
کیم اونا ایلسه حرمت منه حرمت ائلیوب
فرقی یوخ احمدیله فاطمه ی اطهرده
اولاً مظهر خلقتدی بونا یوخ شبهه
ثانیاً خدمت ائدن مزدین آلار آخرده
بئله اظهار ائلدی بوخبری روح الامین
شأن زهرانی خدا وصف ائلیوب کوثرده
تا خدا خلق ائلیه آدمی آب وگلدن
خلق اولونموشدی قیزون نیّره ی انورده
اونابیررتبه عنایت ائلیوب ربّ ودود
واردی بورتبه اوبانوی همایونفرده
اینجیده کیم بوفنا یئرده قیزون فاطمه نی
یوم محشرده گرفتار اولاجاق مین درده
کیمی عفو ایلسه محشر گونی زهرای بتول
قالماز اُول نامه ی اعمالی اونون اللرده
چون قیامتده شفاعت ائلین زهرادی
وار گوزی امّتوون بو شرف ِ باورده
قانلی قنداق علی اصغری آلجاق الینه
آناسی فاطمیه جان دییجک اصغرده
دیه جک اوغلومون عاشقلری بیربیرگلسون
کیمده وارعشق حسین قالمیاجاق کیفرده
آلتی آیلیقدی ولی باب الحوایج دی بالام
واردی عطشان بالامون ایندی گوزی داورده
بولار اسباب شفاعتدی سیزه ای امّت
عفو ائدر سیزلری حقّ عرصه گه محشرده
باباسی ختم رسل دورسیزیچون راه نجات
قویماز امّت قالا محشرگونی دردسرده
کیمه اللّه بوگوزل مرحمتین ائتسه عطا
اولاجاق روزجزا محضر پیغمبرده
خوش اونون حالینه تیموری اوگون ختم رُسل
بویوراغصّه یمه واردی آدون دفترده
سنیده روز جزا ختم رُسُل عفوائله سین
اولسا تقصیروخطا سن کیمی بیر نوکرده
علی تیموری
@ali_teimorygerde