وئرون خبر اوخیان بلبله نگار گلیر
قوتاردی فصل خزان موسم بهارگلیر
شکوفه لر گل آچوب گلشن موّدتده
گونشده شوقیله اشجاره برگ وبار گلیر
تخیل عالمی گوردوم جمال دلداری
گوزل لیگی ائلیوب حُسنی شرمسار گلیر
دئدیم شراب مصفانی وئر ایچیم ساقی
بساط عشقه بوگون باخما کیم خمار گلیر
شراب نابی ایچنلر نشاط اولور امّا
بیلور مسیر ولایه امیدوار گلیر
چیخون قباقینه بوسه ویرون قدملرینه
غریبه منظره وار شهره شهریار گلیر
به لطف حضرت باری امیر وسرور عشق
شرف وئروب شرفه ایلور افتخار گلیر
حریم حقده گوزلدیر سیلَم اورک توزونی
کی یاری درک ائلین صاحب وقار گلیر
توکم عطرلی گلی اُول گلین ایاقلارینا
باشیندا تاج شرف دلده عشق یار گلیر
وئرون جهاندا خبر اهل عشق واهل دله
سرای عشقه قوناقدیر هزار هزار گلیر
ملکدی گوگدن اَنور حرمتیله یئر یوزونه
سمادن اوستوموزه مثل اینکه قار گلیر
آچیخدی باب ولایت گلنلرین اوزونه
حضور دلبره، عشّاقی بی شمار گلیر
گلن بیلوربو گوروشده بیرآیری لذت وار
کی اهل راز و مناجاته رازدار گلیر
طریق عشقی گئزنده، امان قرار اولماز
اودور هامی بورا بی صبرو بی قرار گلیر
کمال حرمتیلن حُسن یاره تیموری
الینده تحفه سی وار ائتمگه نثار گلیر
✍علی تیموری
🆔 @gerdeh_ir