آغلاتدی شمر دون اورگی قان رقیه نی
شامه آپاردی سینه سی سوزان رقیه نی
ای آستانه سینده ملک پاسبان اولان
گیزدیردی دشمن ایچره اورگ قان رقیه نی
سالدی فلک بلایه باشین سینه داغلادی
ائتدی مسیر عشقیده نالان رقیه نی
اوچ سنّیده اوشاقدا مگر بیر گناه اولار
ویردی مکرر عامل سفیان رقیه نی
سلطان عشقیلن دولانیبدور شَهَرلری
چوخ چوخ یوروبدی دشت وبیابان رقیه نی
یاندیردی خیرداجا اورگین نار روزگار
جور حوادث ایلدی بی جان رقیه نی
آچدی مسیر عشقیده بیر غملی منظره
دلبسته ائتدی منظق برهان رقیه نی
الله بیلور نه محنتیلن چاتدی مقصده
ویرانسراده ایلدی مهمان رقیه نی
توش ایلدی مصیبته کنج خرابه ده
آغلاتدی گونده سینه سی شان شان رقیه نی
بوینون قویاردی چگنینه آغلاردی زار زار
نالان ائدردی ناله ی نالان رقیه نی
سسلردی گل بابا گوزووه گوزلریم فدا
سال یادووه بو گوزلری گریان رقیه نی
جان اوسته دور بابا یولووی گوزلیور سنون
سالمیش بو حاله ظالم دوران رقیه نی
القصّه چاتدی قانلی باشا ایلدی فغان
گوردی سرای حزنیده سلطان رقیه نی
✍علی تیموری
🏴 شهادت غریبانه زهرای سه ساله حضرت رقیه (س) تسلیت باد 🏴🖤🥀
🆔 @gerdeh_ir