کوی حضرت عشقه گلدی عالمین شاهی
گیدی جامهٔ عشقی اولدی عشقون همراهی
آچدی باب ایمانی وئردی درس عرفانی
دعوت ایلدی حقّه اهل کبر وخودخواهی
بیت حضرت حقّه گلدی ایلدی صحبت
گوردیلر حسیندور هر رمز و رازین آگاهی
بیلدیلر کی حقّیلن باغلیوب حسین پیمان
حقّ یولیندا جان وئرسین عزّت وشرف ماهی
ثابت ایله سین کیمدور عبد پاک رحمانی
سرزمین رحمتدن چیخسون عالمون شاهی
تاتوکولمه سین بیتِ ذات حقیده قانی
ذات حقّین حفظ اولسون دهریده گرک جاهی
آیرولوبدی السّاعه بیت ربّ اعلادن
چاتدی بزم دلداره آچدی سدّ اولان راهی
حضرتین قدومیلن تاپدی کربلا زینت
اولدی اهل ایمانین کربلا پناه گاهی
گلدیلر اوصحرایه چوخلاری مقام اوسته
بیر به بیر گلن گئتدی قالدی حقین اسپاهی
آغلا ای گوزوم آغلا قلب عالمی داغلا
کربلاده واللهی آغلادوبلار اللهی
وار یری بوصحرایه شدّت مصیبتدن
محنت بلا یاغسا آسمان حکمتدن
(ع) عالم حقیقتدن گوردیلر ندا گلدی
(ع) عرشه چکدیلر قاره موسم عزا گلدی
(ل) لااله الاالله صوتی کلّ افلاکه
(ل) لرزه سالدی السّاعه ذات کبریا گلدی
(ی) یاحسین سسی دوتدی عرش و فرش رحمانی
(ی) یئرده یاسی باشلاندی گوگدن آه و وا گلدی
(ت):تار اولوب بوتون دنیا ناله ایلیور زهرا
(ت) تیر غم بولوب قلبین سینه سی یارا گلدی
(ی) یاسلیام دئدی یارب هربلایه تابیم وار
(ی) یاره دگدی سینمدن باشیمه بلاگلدی
(م) محو اولوبدی انسانلیق معرفت قالوب باشسیز
(م) ماتم شه عشقه آل مصطفی گلدی
(و) وقت او وقت اولوب حضرت دوشدی ذولاجناحیندن
(و) وای دئیوب الی باشدا خیرةالنساء گلدی
(ر) راضی ام دئدی یارب سن رضا اولان یئرده
(ر) روحیمه صفا وئردون دادیمه خدا
گلدی
(ی) یار و یاوریم بیربیر گئتدی کوی یاریمدن
(ی) یاری گورمگه یارب یار باوفا گلدی
قبله گاه طاعتده من باخیردیم اطرافه
گوردوم حضرت عشقی قلبیمه قوا گلدی
دشت غمده واویلا فضلی چکدیلر داره
قلب حضرت عشقه اوندا ویردیلار یاره
لوح عشقه ثبت اولدی کربلای عاشورا
سالدی عالمه غوغا ماجرای عاشورا
آچدی پرچم حقّی آسمان. رحمتده
قوردی خیمهٔ عشقی مقتدای عاشورا
سالدی حیرته عقلی یخدی ریشه دن ظلمی
قویدی عشقه تأثیرین آشنای عاشورا
نظمین انضباتیندن حکمت آشکاراولدی
سالدی شوقیدن قدری اقتدای عاشورا
خط سیر عرفانی عالمه نشان وئردی
زنده ایلدی حقّی پیشوای عاشورا
گلدی عالم زردن اهل عشق وعرفانه
بیر ندای جان بخش وخوشنوای عاشورا
قانه غرق اولوب یکسرحقّ یولیندا لب تشنه
عالمه صفا وئردی ابتلای عاشورا
شیر بیشهٔ حقّون اوخ دگوب جبینیندن
دوغرانوب فرات اوسته مرتضای عاشورا
حاکمان منفورین قدرتین آلوب الدن
قان وئروب گووَرسون تا لاله های عاشورا
عالمه یقین شأن و شوکتوز عیان اولدی
اجروزی وئروب میر ومقتدای عاشورا
حاشیه قلم گئتمه موسم گریز اولدی
آستان والایه گلدی کیم عزیز اولدی
آغلا مرد رحمانی قانه باتدی مقتلده
آخدی قلبینون قانی قانه باتدی مقتلده
پاسدار عاشورا کچدی جان ومالیندان
زنده ائتدی قرآنی قانه باتدی مقتلده
یار و یاوری بیربیر گئتدیلر شجاعانه
قالدی دینون ارکانی قانه باتدی مقتلده
تایخیلدی مرکبدن ایستی قوملارین اوسته
تشنه لب وفا کانی قانه باتدی مقتلده
ای شرفلی انسانلار آغلیون بومحنتده
نینوا شهیدانی قانه باتدی مقتلده
خیمه لردن الساعه ناله عرشه قوزاندی
کربلا سلیمانی قانه باتدی مقتلده
عالم حقیقتدن گلدی سس کی زهرانون
ظلم الیله قربانی قانه باتدی مقتلده
داشلار آلتدا ای شیعه کینه و عداوتدن
قالدی عشقون عنوانی قانه باتدی مقتلده
یاندی زینبون قلبی دشت غمده بوغمدن
سرور لب عطشانی قانه باتدی مقتلده
سینه دن دگن پیکان آلدی طاقتین الدن
چیخدی ظلمیلن جانی قانه باتدی مقتلده
علی تیموری
تخلص با حروف در وسط شعر نوشته شده است
@ali_teimorygerde
🆔 @gerdeh_ir