بایگانی ماهیانه: مرداد ۱۳۹۱

ملا نصرالدین حکایه لری (قودرتی ایلاهی (الهی))

nasreddin.jpg
بير کيشي سفره گئديردي، بير بارداق قيزيليني امانت
ساخلاماق اوچون قاضی نين يانينا گتيردي. قاضی ائوين تاخچاسيني پول يييه سينه گؤستريب دئدي:
– اؤز الينله امانتي تاخچايا قوي، گليب اؤز الينله ده
اورادان گؤتوررسن.
کيشي بارداغي تاخچايا قويوب گئتدي. قاضی بارداغي آچيب،
قيزيللاري بوشالتدي، بال ايله دولدوردو.
بير نئچه آيدان سونرا پول يييه سي گليب امانتيني ايسته دي.
قاضی تاخچاني گؤستريب دئدي:
– اؤزون قويدوغون يئره ال اوزات، گؤتور.
کيشي بارداغي گؤتوروب ائوينه آپاردي. آچيب ايچينده قيزيل
عوضينه بال گؤردو. دوروب باشيلولو قاضی نين يانينا گليب، احوالاتي دانيشدي. قاضی حاليني پوزمادان دئدي:
– آللاهين قودرتيندن اوزاق دئييل، سني هئچدن يارادان
آللاه قيزيلي دا بال ائله يه بيلر.
کيشي کور-پئشمان ائوينه قاييتدي، اؤزونو مذمت
ائتمه يه باشلادي: «منه دئين گرک، آي آخماق، آدام دا قويونو قوردا تاپشيرار!»
…هارادانسا بهلول داننده بو احوالاتي ائشيتدي، کيشيني
چاغيرتديريب دئدي:
– هئچ آه-اوف ائلمه، گئت ائوينه، اوچ-دؤرد آيا سنين
پوللاريني قاضیدان آلاريق.
قاضینين اوغلانلاري بهلولون ائوينده اوندان درس آليرديلار.
بهلول اووچولارين واسيطه سيله بير جوت آيي بالاسي تاپديردي و اونلارا تعليم وئرمه يه باشلادي. اولجه قاضی نين موقوواسيني دوزلتدي. اونو باشيندا اممامه، چيينينده ابا، يئرده اَيلشن قويوب، هر گون آيي بالالاريني موقووانين ديزي اوسته يئديريب ايچيرديردي… بئله ليکله، آيي بالالاري قاضی نين موقوواسينا اؤيرشديلر.
بير گون بهلول درسدن سونرا قاضی نين اوغلانلاريني ائوه
بوراخمادي، اونلاري بير اوتاغا سالدي. قاضی آخشاموستو
اوغلانلاري نين ائوه گلمه ديگيني گؤروب بهلولا خبر گؤندردي کي، اوشاقلار نييه ائوه قاييتماييبلار؟ بهلول دا جاواب وئردي کي، تعجوبلو بير حاديثه باش وئريب: اوشاقلار دؤنوب آيي اولوبلار؛ قاضی گليب آيي بالالاريني آپارا بيلر. بو خبري ائشيدن قاضی تئز بهلولون يانينا گئتدي. بهلول اونا دا اول دئديگي سؤزلري سؤيله دي.
قاضی گئديب هارونا شيکايت ائله دي. هارون بهلولو
چاغيرتديريب احوالاتي سوروشدو. بهلول دئدي:
– خليفه ساغ اولسون، قاضی نين اوشاقلاري کيتاب اوخودوقلاري
زامان من باييرا چيخميشديم، قاييديب اوتاغا گيرنده
گؤردوم کي، اوشاقلارين يئرينده ايکي آيي بالاسي اَيلشيب. او دقيقه باشا دوشدوم کي، آللاهين قودرتيله اوشاقلار دؤنوب آيي بالاسي اولوبلار. اينانماييرسينيزسا، گئديم بو ساعات آيي بالالاريني، يعني قاضی نين اوشاقلاريني گتيريم مجليسه.
بهلول گئتدي، قاضی هارونون مجليسينده اوتوروب گؤزله دي.
چوخ چکمه دن بهلول آيي بالالاريني هارونون مجليسينه گتيردي. بهلول ايکي گون ايدي کي، آيي بالالاريني آج ساخلاييردي. ايچري گيرجک اونلاري بوراخدي. آييلار اطرافا باخماييب، بيرباش قاضی نين اوستونه جومدولار و هميشه کي عادتلري اوزره، بورونلاري ايله اونون اباسي نين و لبباده سي نين آلتيني آختارماغا باشلاديلار.
بهلول دئدي:
– خليفه ساغ اولسون، هرگاه بونلار قاضی نين اوشاقلاري
دئييلسه، بس نييه مجليسده اوتوران بو قدر آدامي قويوب تکجه قاضی نين اوستونه جومدولار؟
قاضی مايوس اولوب ائوينه قاييتدي. آخشام اولجاق بهلولون
يانينا گليب دئدي:
– بهلول، دوزونو دئ، بو نه کلکدير منين اوچون
قورموسان؟ آخي آدام دؤنوب آيي اولا بيلمز!
بهلول دئدي:
– سنه امانت وئرن کيشي نين بالي قيزيل اولمايينجا، آيي
بالالاري دا دؤنوب سنه اوغول اولماياجاقلار.
قاضی توتدوغو ايشدن پئشمان اولوب، قيزيللاري بهلولا وئردي.
بهلول دا اوشاقلاري بوراخيب، قيزيللاري صاحيبينه قايتاردي.